ኢትዮጵያ ከውጪ አገር የሚመለስ ማንኛውም መንገደኛ ለለይቶ ማቆያ በተመረጡ ሆቴሎች ለ 14 ቀን ተለይቶ እንዲቆይ ያስቀመጠችውን ግዴታ ለዲፕሎማቶች እንዲሁም በሀገሪቱ ለተመዘገቡ አለም አቀፍ እና አህጉራዊ ድርጅቶች ሰራተኞች አላላች። የውጭ ጉዳይ ሚኒስቴር ለተቋማቱ በላከው ደብዳቤ ከማክሰኞ ግንቦት 18፤ 2012 ጀምሮ የሚመለሱ ዲፕሎማቶች እና የየድርጅቶቹ ሰራተኞች በመኖሪያ ቤታቸው ወይም በየኤምባሲዎቻቸው ውስጥ ተለይተው መቆየት እንደሚችሉ ገልጿል።
ውሳኔው የሚመለከታቸው በአለም አቀፍ እና አህጉራዊ ድርጅቶች ውስጥ የሚሰሩ የዲፕሎማቲክ እና የሰርቪስ ፓስፖርት ያላቸው ሰዎች እንዲሁም የቅርብ ቤተሰቦቻቸው እንደሆነም ይፋ ተደርጓል። የተጠቀሱት ግለሰቦች “ከዚህ በኋላ መንግስት በለያቸው ሆቴሎች ራሳቸውን እንዲያገልሉ አይጠበቅባቸውም። ነገር ግን የጤና ሚኒስቴር ባወጣው መመሪያ መሰረት ለ14 ቀን ራሳቸውን ለይተው እንዲቆዩ ይጠበቅባቸዋል” ሲል ሚኒስቴሩ በደብዳቤው አመልክቷል።
ግለሰቦቹ ወደ አገር ውስጥ ከመመለሳቸው በፊት ለውጭ ጉዳይ ሚኒስቴር ራሳቸውን ለይተው የሚቆዩበትን አድራሻ ማስገባት የሚጠበቅባቸው ሲሆን ሚኒስቴሩም ለሚመለከታቸው የመንግስት የስራ ክፍሎች ያስታውቃል። ማንኛውም ተመላሽ በለይቶ ማቆያ ውስጥ ሊከናወኑ የሚገባቸው ተግባራትን በተመለከተ የወጡ መመሪያዎችን የመተግበር ግዴታዎች እንዳሉበት ሚኒስቴሩ ገልጿል። (ኢትዮጵያ ኢንሳይደር)
